DeA_L&D_icona_strumenti

Bernart de Ventadorn, Can vei la lauzeta

               Can vei la lauzeta mover
               De joi sas alas contral rai,
               Que s'oblid' e·s laissa chazer
               Per la doussor c'al cor li vai,
5             Ai! Tan grans enveya m'en ve
               De cui qu'eu veya jauzion,
               Meravilhas ai, car desse
               Lo cor de dezirer no·m fon·

               Ai, las! Tan cuidava saber
10           D'amor, e tan petit en sai,
               Car eu d'amar no·m posc tener
               Celeis don ja pro non aurai·
               Tout m'a mo cor, e tout m'a me,
               E se mezeis e tot lo mon;
15           E can se·m tolc, no·m laisset re
               Mas dezirer e cor volon·
 

               Anc non agui de me poder
               Ni no fui meus de l'or' en sai
               Que·m laisset en sos olhs vezer
20           En un miralh que mout me plai·
               Miralhs, pus me mirei en te,
               M'an mort li sospir de preon,
               C'aissi·m perdei com perdet se
               Lo bels Narcisus en la fon·
 

25           De las domnas me dezesper;
               Ja mais en lor no·m fiarai;
               C'aissi com las solh chaptener,
               Enaissi las deschaptenrai·
               Pois vei c'una pro no m'en te
30           Vas leis que·m destrui e·m cofon,
               Totas las dopt' e las mescre,
               Car be sai c'atretals se son·
 

               D'aisso's fa be femna parer
               Ma domna, per qu'e·lh o retrai,
35           Car no vol so c'om voler,
               E so c'om li deveda, fai·
               Chazutz sui en mala merce,
               Et ai be faih co·l fols en pon;
               E no sai per que m'esdeve,
40           Mas car trop puyei contra mon·

               Merces es perduda, per ver,
               (Et eu non o saubi anc mai,)
               Car cilh qui plus en degr'aver, 
               No·n a ges, et on la querrai?
45           A! Can mal sembla, qui la ve,
               Qued aquest chaitiu deziron
               Que ja ses leis non aura be,
               Laisse morrir, que no l·aon·
 

               Pus ab midons no·m pot valer
50           Precs ni merces ni·l dreihz qu'eu ai,
               Ni a leis no ven a plazer
               Qu'eu l'am, ja mais no·lh o dirai·
               Aissi·m part de leis e·m recre;
               Mort m'a, e per mort li respon, 
55           E vau m'en, pus ilh no·m rete,
               Chaitius, en issilh, no sai on·

               Tristeza, no·n auretz de me,
               Qu'eu m'en vau, chaitius, no sai on·
               De chantar me gic e·m recre,
60           E de joi e d'amor m'escon·